.بش نعاونوا اخوانا في غزه

السلام عليكم

, يا جماعه خاطرتلي فكره جهنميه من افكاري المبتكره , و انا نتفرج على قناة فضائيه عربيه .
. بش نعاونوا اخوانا في غزه اللي مساكن مش لاقيين لا دوا لا ماكله .. الدليل على ذلك البيوت القصديريه اللي اسرائيل تضرب فيها و اللي نشوفو فيها في غزه عبر الجزيره مباشر لول ..
الفكره متاعي هي انو نقومو بحمله احنا المواطنين التوانسه عل الفايسبوك بش النحبه متاعنا المتمثله في الفنانين و المفكرين و المثقفين التوانسه و السياسيين زاده اللي ما يخفى على حد انهم موجودين عل الفايسبوك .. نقومو بحمله من اجل اقناعهم بان يظغطو عل الحكومه اللي لازمها بدورها تظغط على تونيزيانا و تونيزي تيليكوم انهم يفتحوا باب التبرعات الالكترونيه عبر السمس
sms de 1 dinar chaqu'un
.. نعرفو اللي سيد الرئيس كثر خيرو اذن بفتح حساب بريدي للتبرع لكن انا حسب رايي التبرعات ما كانتش كبيره لانو الناس فاده و قالقه و ايظا نقولوه للامانه تكثر الاشاعات حول انو الفلوس ماهيش بش توصل .. و نقترح لكي تفند هذه الاشاعات المغرضه ان يقع تكوين لجنة مراقبه متكونه من شحصيات عامه محبوبه و الناس تثق فيها من غير السياسيين ليس لاننا لا نثق فيهم لا سمح الله لكن لتدعيم المصداقيه فقط . شخصيات مثل توفيق الجبالي , سنيه مبارك و دالي نهدي و الفه يوسف و سلوى الشرفي و آخرون .

envoyez vos emails a tunisiana et tunisie telecom pour concrétiser ceci


انا حسب تكهناتي و علمي المسبق بالتعاطف الشديد متاع التوانسه مع الفلسطينين اخوان العروبه و الدين نجم نأكدلكم انو انتبرعات بش توصل لرقم خيالي .. احنا عنا 7 مليون اشتراك في الجمهوريه متاع هاتف جوال .. لو كل اشتراك يدفع 5 دنانير نتحصلو على 35 مليار في 24 ساعه . بقى طوه نحاولو نفهمو كيفاش بش نوصلو التبرعات لهاك ليتامى مساكن و المدنيين الجواعه .. فتح خسرت الانتخابات بسبب اتهامات الفساد و الرشوه ... حماس منظمه ارهابيه و اذا نعطيوها فلوس ترصيلنا في غوانتانامو ... اشنوه الحل ? حلين يا نعطو الفلوس لليهود التوانسه في اسرائيل كوم مام توانسه كيفنا ولاد بلاد طو يوصلو الامانه .. و الا تعرفش كيفاش نعطيو الفلوس للطلبه التوانسه اللي يقراو و يعلم ربي بحالهم و تلقى الولي مسكين يقطع من لحمو بش يعطي لولدو يقرى خاصة اولاد الجنوب اللي يعملو 500 كم بش يقراو في تونس .. على حد علمي عدد الطلبه فت تونس ما يتزاوزش 300 الف طالب علم .

. 35 مليار مقسوم على ربع مليون يطلع باي كل طالب علم 116 مليون مليم تونسي , الفلوس هاذي ينجم الطالب يقرا بيها و يتنغنغ و يعمل فاكانس هو و صاحبتو في الويكاند في الحمامات و يشري ارديناتور ماك اخر صيحه و يعمل فيزا و يقرى البرا مرحله ثالثه .. بعد 25 سنه يولي عنا جيل من الدكاتر و الدمادم في شتى العلوم ينجمو يخترعولنا سلاح ردع اقوى من القنابل الذريه يحمينا و يحمي اولادنا .. و يولي عنا وزن استراتيجي مما قد يمكنا من احتلال القاره الفريقيه كل

و مبعد نجمو ناخذو عضويه دايمه في مجلس الامن و نصدرو قرار بش اسرائيل تقبل بقرار التقسيم متاع 1948 و يعيش العالم في سلام و امن و يجيوبو صبيان و بنات و توته توته وفات الحدوته..